നൂൽപ്പാവകൾ

നൂൽപ്പാവകൾ

         ഭക്ഷ്യവിഷബാധയെ തുടർന്ന് കുറച്ചുദിവസം അയാൾ ആശുപത്രിയിലായിരുന്നു. ഒരാഴ്ച്ച വീട്ടിൽ റെസ്റ്റ് എടുക്കണം എന്നുപറഞ്ഞ് ഡോക്ടർ വിട്ടതാണ്.തിരക്കുള്ള ഈ ജീവിതത്തിനിടയിൽ ലീവെടുത്ത് വീട്ടിൽ രണ്ടുദിവസം സ്വസ്ഥമായി ഇരിക്കണമെന്ന് കുറേനാളായി വിചാരിക്കുന്നതാണ്. ഇപ്പോൾ ഇങ്ങിനെയാണ്‌ അയാൾക്ക് അത് സാധിച്ചത്. ഞായറാഴ്ച്ചപോലും എന്തെങ്കിലും തിരക്കുണ്ടാവാറാണ് പതിവ്.

                                                വീട്ടിൽ TV ഉണ്ടായിരുന്നെങ്കിലും അയാൾക്ക് അത് കാണാനൊന്നും മുൻപ് സമയം കിട്ടാറില്ലായിരുന്നു. ഇപ്പോൾ അയാൾക്ക് സമയം കളയാൻ TV യെ ആശ്രയിക്കേണ്ടിവന്നു.

                   ഇപ്പോൾ അയാൾ വാർത്ത കേട്ടുകൊണ്ടിരിക്കുകയാണ്. വാർത്തയിൽ പറയുന്നുണ്ട് ഭക്ഷ്യവിഷബാധയെകുറിച്ച്.ഭക്ഷണസാധനങ്ങൾ കേടുവരാതിരിക്കാൻ അതിൽ മായം ചേർക്കുന്നതാണ് പ്രധാന കാരണം. ഫാസ്റ്റ്ഫുഡ് രീതിയിലുള്ള ഭക്ഷണങ്ങൾ വളരെ അപകടകാരികൾ ആണെന്നും, ഉപയോഗിക്കുന്ന എണ്ണ മുതൽ വിളമ്പുന്ന പാത്രം വരെ മനുഷ്യരുടെ ആരോഗ്യത്തിന് ദോഷം ചെയ്യുമെന്നും പറയുന്നു. പച്ചക്കറികൾ പോലും ഇപ്പോൾ വിശ്വാസയോഗ്യമല്ലെന്നും വാർത്തയിൽ പറയുന്നു. രാസവളങ്ങൾ ഉപയോഗിച്ച് ഉണ്ടാക്കുന്ന പച്ചക്കറികൾ കേടുവരാതിരിക്കാനായി രാസവസ്തുക്കളിൽ മുക്കുന്നതും പൊതിയുന്നതും എല്ലാം പറയുന്നുണ്ട്. മത്സ്യത്തിലും മാംസത്തിലും വരെ അത് പ്രയോഗിക്കുന്നുണ്ടെന്നു പറഞ്ഞപ്പോൾ അയാൾ ശരിക്കും തരിച്ചുപ്പോയി.

                                                      അപ്പോഴേക്കും വാർത്ത കേൾക്കാനായി അയാളുടെ ഭാര്യയും എത്തി. "വന്ന് വന്ന് ഒന്നും കഴിക്കാൻ പറ്റാത്ത സ്ഥിതിയായിരിക്കുന്നു.അരിയിൽ പോലും മെഴുക് ചേർക്കുന്നുണ്ടത്രേ.." അവൾ പറഞ്ഞു. അപ്പോഴേക്കും വാർത്തക്ക് ഇടയിലുള്ള പരസ്യത്തിൻറെ സമയമായി. സോപ്പിന്റെയും പൌടെരിന്റെയും ക്രീമിന്റെയുമെല്ലാം പരസ്യങ്ങൾ. പാലും,ബദാമും,അണ്ടിപ്പരിപ്പും,പപ്പായയും,നാരങ്ങയും ഒലീവും എല്ലാം ഉപയോഗിച്ചുണ്ടാക്കിയ സാധനങ്ങൾ.

                                                 ദൈവമേ..എന്ത് കലികാലമാണ് ഇത്. തിന്നുന്നതിലെല്ലാം മായം. പൌടെരിലും സോപ്പിലും ക്രീമിലുമെല്ലാം പോഷകഗുണം ഉള്ള സാധനങ്ങളും. എല്ലാവർക്കും പുറംമോടി മാത്രം മതിയോ..., എവിടെച്ചെന്നു അവസാനിക്കും ഇതെല്ലാം....?!!!